ПСРЛ. Т.26. Вологодско-Пермская летопись. М.-Л., 1959.

(с.274)

1480. И прииде на него из Заволжья Ногаевич князь Иванча, Нагайской князь, и самого уби, а царевичи же дети его убежаша, а дочерь его взя и Орду розпустоши, и базарь разграби, и полон весь за Волгу перевезе в Ногаи.

(с.275)

1483. О вогуличах. В лето 6991. Отпустил князь Великий с Москвы на князя на Вогульского на Асыку воеводу своего Ивана Ивановича Салтыка, а с ним своих (с.276) детей боярских да Вологжан. А другово воеводу князя Федора Купрьского, а с ним своих детей боярских да Устюжан, да Вычегжан, да Вымич, да Великопермьцов. И поидоша судех с Вологды, Иван Иванович Салтык, месяца апреля 25, и приидоша на Вогуличи месяца июля в 29, и бои бысть. И побегоша Вогуличи Асыка и сын его Юмшан, и поидоша оттоле воеводы великого князя в Сибирь и повоеваша Сибирьскую землю, и поидоша оттоле на великую реку Обь, ширина ея шездесят верст, и поимаша князя Молдаша на реце Оби, и княжих Екмычеевых дву сынов поимаша. И прииде Иван Иванович Салтык на Вологду ноября в 9…..Того же лета приходили к великому князю от Вогульского князя Юмшана, Асыкина сына, бити челом о опасе шурин его Вогулятин Юрга да сотник его Вогулятин Анфим. А печаловался об нем владыка Филофей Пермьскы. И князь великий Иван Васильевич пожаловал владыкы деля Филофея, Юмшану опас дал и велел ему у себя быти. И послал владыка с великого князя опасом к Юмшану слугу своего Леваша. Того же лета приходил к великому князю бити челом Вогулятин князь Пыткеи с поминки с великими от князей Кодских, от Лаба да от Чангила, и от всее земли Кодские и Югорьские, да били челом о полоненных князех о Молдаше с товарищы, чтобы государь смиловался, отпустил бы их в свою землю. И князь великий пожаловал тех князей полоненных, отпустил их в свою землю да и Пыткея печалованием владыки Филофея да Володимера Григорьевича Ховрина.

(с.290)

1496. О казанском взятии. В лето 7004. Царь Мамук Иваков брат Тюменского, пришед с Нагаи. Взяша град Казань.Того же лета, майа, посла князь великий Иван Васильевич в Казань на царство царя Абдыл Летифа, меншого брата царя Казанского Махмед Аминева, а с ним послал воевод своих князя Семена Даниловича Хольмского да князя Федора Палетцкого со многими детми боярскими и веле его посадити в Казань на царство.

(с.294)

1500. Того же лета приходиша Ногаи под град Казань, Муса мурза да Ямгурчъи мурза, со многими людми на Казанского царя Абдыл Летифа, Абреимова сына. А великого князя воеводы быша тогды в Казани князь Михаило Курбьскои Ярославьскои да князь Петр Лобан Ряполовскои не со многими людми. И стояша Ногаи под Казанью три недели и, граду не успев ничто же, возвратишася во свояси.